پھل تے سبزیاں دی پیداوار 30 گنا جݙاں جو اناج دی 80 فیصد تئیں ودھاوݨ کیتے اقدامات کریندے پیوں، وزیر اعظم دے معاون خصوصی غذائی تحفظ و تحقیق

اسلام آباد۔30جون (اے پی پی):وزیر اعظم دے معاون خصوصی غذائی تحفظ و تحقیق جمشید اقبال چیمہ آکھیے جو ملک اچ پھل تے سبزیاں دی پیداوار 30 گنا جݙاں جو اناج دی 80 فیصد تئیں ودھاوݨ کیتے اقدامات کریندے پیوں، پاکستان 25 ارب ڈالر مالیت دا کھیر تے ڈیری مصنوعات برآمد کرسڳدے ، زرعی ٹرانسفارمیشن پلان اچ خوراک تے خصوصی توجہ ݙتی ڳئی اے ، حکومت دی کوشش اے جو پاکستان خوراک برآمد کرݨ آلا ملک بݨے ، کسان کنونشن اڄ خمیس کوں تھیسی جیں اچ چارے صوبیں ، گلگت بلتستان اتے آزاد کشمیر متعلق وزرا، حکام تے بین الاقوامی ماہرین وی شرکت کریسن ۔ اے ڳال انہاں ٻدھ کوں پریس کانفرنس توں خطاب کریندے ہوئیں آکھی اے، انہاں آکھیے جو غذائی تحفظ کوں یقینی بݨاوݨ کیتے حکومت زرعی شعبہ دے بجٹ کوں گزریل دور دے مقابلے اچ 1.6 ارب روپے توں ودھا تے 62 ارب روپے تئیں کرݙتے ، وزیراعظم دے ویژن دے مطابق ملک کوں ساوا تے سوہݨا بݨایا ویسی ، زراعت ملک دی ترقی اچ اہمیت رکھیندی اے، حکومت ایندے سارے شعبیں کوں ہکو سویں ترقی ݙیوݨ کیتے موثر حکمت عملی دے تحت کم کریندی پئی اے ۔ انہاں آکھیے جو خوراک جتنا اہم شعبہ اے ایں تے ماضی اچ اتنی توجہ نی ݙتی ڳئی ، ٻالاں دی نشوونما کیتے خوراک اہم اے۔ موجودہ حکومت اقتدار اچ آندے ہی نہ صرف پیداوار ودھاوݨ تے توجہ ݙتی بلکہ شہریاں کوں غذائیت توں بھر پورخوراک دے پاسے گھن آوݨ کیتے اقدامات کیتن ، ایں ویلھے واٹر کنزرویشن اچ ٻہوں کم تھیندا پئے ۔صوبہ بلوچستان اچ گزریل چار سالاں اچ 735 ڈیم بݨن تاں جو پاݨی دی کمی کوں پورا کیتا ونڄ سڳے ، اساں ݙے 22 کروڑ ایکڑ زمین اے جیں اچوں ساݙھے 5 کروڑ آباد اے۔ وزیر اعظم دے ویژن دے تحت ہدف مقرر کیتا ڳئے سارے ملک اچ ٻوٹے رادھے ویسن غیر آباد رقبے کوں ساوا بݨایا ویسی ۔ زرعی ٹرانسفارمیشن پلان اچ خوراک تے خصوصی توجہ ݙتی ڳئی ۔ خوراک انساناں تے زناوراں کیتے ضروری ہے۔ خوراک دی پیداوار اچ ودھارا تے معیار بہتر کرتے نہ صرف غذائیت دی گھٹکی پوری کیتی ونڄ سڳدی اے بلکہ برآمدات وی ودھائی ونڄ سڳدی اے ،وسائل دا بہتر توں بہتر استعمال ٻہوں ضروری اے ۔ہدف مقرر کیتا ڳئے جو اساں خوراک برآمد کرݨ آلا ملک بݨیسوں ،موجودہ حکومت منظم و موثر حکمت عملی دے تحت زراعت دا پاسہ بدلیندی پئی اے۔ ملک اچ پھل تے سبزیاں دی پیداوار 30 گناودھ جݙاں جو اناج دی 80 فیصد ودھیندے پیوں اتے لائیو سٹاک دی ترقی کیتے وی اقدامات کریندے پیوں ۔ جانوراں دی نسل اچ بہتری سانگے کم تھیندا پئے۔ ٻاہرلے ملکاں دی ڳئوں اساݙی ڳئوں توں چھی گنا ودھ کھیر ݙیندی اے ،اساں ݙے کھیر مہانگا اے اساں کھیر کوں خالص کرݨ ویندے پیوں کہیں وی وݙے شہر اچ کھیر ٹیسٹ دے بغیر داخل نہ تھجیسی ۔اساں ترائے گنا کھیر دی پیداوارودھاوݨ ویندے پیوں ،پاکستان 25 بلین ڈالر دا کھیر تے ایندی مصنوعات برآمد کرسڳدے ۔ انہاں آکھیے جو بلوچستان، فاٹا ، جی بی اتے پوٹھوار اچ ٻہوں ساری زمین غیر آباد اے، فاٹا کوں 52 ارب لوکاں دی آباد کاری کیتے ݙتن، شمالی علاقیں اچ پھل تے سبزیاں رہیسوں، سارے ڈرائی فروٹ مقامی سطح تے رہیندے پیوں ، اساں خوراک دے نظام اچ بہتری گھن آتے غذائیت دے اعتبار نال لبئے ملکاں دے برابر ویسوں ، موجودہ حکومت ایں شعبےکوں ترجیح ݙیندے ہوئیں غذائی تحفظ دا مسئلہ حل کریندی پئی اے ۔ ٹی سی پی کاٹن گھنسی کاٹن اساݙی ترجیح اے۔ حکومت کاٹن مل گھنݨ کیتے بجٹ رکھیے اساݙی کوشش اے جو 80 فیصد کاٹن لوکل ݙتی ونڄے ۔ دنیا اچ جیڑھیاں وݙیاں فصلاں ہن انہاں کوں اتھاں چھوٹا سمجھیا ویندے ،تحقیقی سرگرمیاں دے ودھارے کیتے ݙاہ ارب رکھیے ڳئن ، انہاں آکھیے جو حکومت زرعی ٹرانسفارمیشن دے ذریعے خوراک و زراعت تے توجہ ݙیندی پئی اے ۔ وزیراعظم عمران خان اڄ کسان کنونشن زرعی ٹرانسفارمیشن دے خدوخال بیان کریسن ۔