پاکستان اتے سعودی عرب دا وزارت خارجہ اچ فوکل پرسنز تعینات کرݨ تے اتفاق، اعلیٰ مشاورتی کونسل قائم کرݨ دا فیصلہ ، وزیر خارجہ شاہ محمود قریشی دی سعودی ہم منصب شہزادہ فیصل بن فرحان دے رلے پریس کانفرنس

اسلام آباد۔27جولائی (اے پی پی):پاکستان اتے سعودی عرب اقتصادی،سرمایہ کاری اتے ثقافتی و سفارت کاری سودھے مختلف شعبیں اچ تعاون ودھاوݨ ،ݙو پاسے تعلقات دے استحکام کیتےاعلیٰ سطح دے رابطے دے تسلسل اتے پاک سعودی وزارت خارجہ اچ فوکل پرسن تعینات کرݨ تے اتفاق کیتے ۔ سعودی عرب اتے پاکستان دے سانجھے تعلقات دے ودھارے کیتے سعودی۔پاکستان اعلیٰ مشاورتی کونسل قائم کرݨ دا وی فیصلہ کیتا ڳئے ۔منگل کوں پاک سعودی وزرائے خارجہ وچال وفد دی سطح تے مذاکرات دے بعد سعودی ہم منصب شہزادہ فیصل بن فرحان آل سعود دے رلے مشترکہ پریس کانفرنس توں خطاب کریندے ہوئیں وزیر خارجہ شاہ محمود قریشی آکھیے جو اساݙے سعودی عرب دے نال تعلقات پراݨے تے تاریخی ہن، مخدوم شاہ محمود قریشی آکھیے جو اساݙے ݙو طرفہ اتے وفد دی سطح تے مذاکرات تھئن، اساں اقتصادی رابطے دے ودھارے ، سرمایہ کاری کوں ودھاوݨ تے خصوصی ڳال مہاڑ کیتی ۔ شاہ محمود قریشی آکھیے جو سعودی عرب اتے پاکستان دے سانجھے تعلقات دے ودھارے کیتے سعودی۔پاکستان اعلیٰ مشاورتی کونسل قائم کرݨ دا فیصلہ کیتا ڳئے ۔وزیر خارجہ آکھیے کل اتھاں پاکستان اتے سعودی عرب وچال سپریم کوآرڈینیشن کونسل دے سٹرکچر تے مذاکرات تھئے، سپریم کونسل دے کم دے طریقہ کار تے ڳال مہاڑ تھئی ، ایں حوالے نال ݙوہیں ملکاں دی وزارتِ خارجہ اچ فوکل پرسنز دا تعین کیتا ویسی تاں جو اساں کنے آپݨے سانجھے تعلقات کوں ݙیکھݨ کیتے ھک اسٹرکچرڈ اتے ادارہ جاتی رستہ ہووے۔ شاہ محمود قریشی آکھیے جو ݙوہیں ملکاں میڈیا، انفارمیشن،سپورٹس،اتے ثقافت دے شعبیں اچ وی تعلقات کوں ودھیندے پئن۔انہاں آکھیے جو وژن 2030 تبدیلی دا مظہر اے۔اساں تہذیبی رابطے دا ودھارا چاہندون ۔ نویں قیادت دے وژن 2030 دے تحت سعودی عرب تبدیلی دے پاسے ݙیکھدا پئے تے ایں شعبے اچ ماضی اچ کم نی تھیا ایندے وچ اساں آپݨاں کردار ادا کرسڳدوں ، انہاں آکھیے جو لکھاں پاکستانی سعودی عرب اچ رہندن جیڑھے جو اتھاں پاکستانی فلماں دی نمائش ݙیکھݨ ، اپݨے پسندیدہ گلوکاراں دی پرفارمنس توں محظوظ ہووݨ پسند کریسن ، اے او شعبہ اے جیں تے اساں ماضی اچ توجہ نی ݙتی ، انہاں آکھیے اساں مذہبی تعلقات دے نال نال کلچرل تعلقات دا ودھارا چاہندوں ، موسمیاتی تبدیلی دے حوالے نال وزیر خارجہ آکھیے جو گرین سعودی عرب اتے گرین مڈل ایسٹ اتے وزیر اعظم عمران خان دا وژن کلین گرین پاکستان آپت اچ مطابقت رکھدن۔سعودی وزیر خارجہ شہزادہ فیصل بن فرحان آل سعود آکھیے جو پاک سعودی تعلقات کوں مزید ودھارا ݙیوݨ چاہندون ݙوہیں ملکاں ہمیشہ ھک ݙوجھے دا ساتھ ݙتے ، انہاں آکھیے ݙوہیں ملکاں وچال خوشگوار برادرانہ تعلقات قائم ہم۔ݙوہیں ملکاں دے اعلی سطح تے تبادلیں کوں مزید ودھارا ݙتا ویسی ۔