سرجیکل سٹرائیکس متعلق بھارتی وزیر اعظم مودی دے دعوے ڈھونگ، اعلی بھارتی قیادت ولوں دھمکیاں باعث تشویش ہن ،ترجمان دفتر خارجہ

اسلام آباد ۔ 19 اپریل (اے پی پی) پاکستان سرجیکل سٹرائیکس متعلق بھارتی وزیر اعظم مودی دے دعویں کوں ڈھونگ قرار ڈیندے ہوئیں سختی نال مسترد کر ڈتے تے آکھیے جو اعلیٰ بھارتی قیادت ولوں دھکمیاں باعث تشویش ہن ،عالمی برادری بھارت دے دھمکی آمیز بیانات دا نوٹس گھنے ،خارجہ پالیسی اچ قومی مفاد اساڈی پہلی ترجیح اے ،دہشت گردی دے خلاف کامیاب اپریشن نال سوات دیاں رونقاں بحال کر ڈتیاں گن ،افغانستان دے نال سارے معاملات گال بات دے ذریعے حل کرنڑ تے یقین رکھیندوں ،بھارتی جاسوس کمانڈر کلبھوشن یادیو کیس اچ بھارت عالمی عدالت اچ جواب الجواب جمع کرائے ۔خمیس کوں ہفتہ وار پریس بریفنگ دے دوران صحافیاں دے مختلف سوالاں دا جواب ڈیندے ہوئیں ترجمان دفتر خارجہ ڈاکٹر محمد فیصل سرجیکل سٹرائیک متعلق بھارتی وزیراعظم دے دعوے کوں ڈھونگ قرا ر ڈیندے ہوئیں سختی نال مسترد کر ڈتا تے آکھیا اعلیٰ بھارتی قیادت ولوں دھکمیاں باعث تشویش ہن ،عالمی برادری کوں بھارت دے دھمکی آمیز بیان دا نوٹس گھننڑاں چاہیدے ۔ترجمان آکھیا ولا ولا کوڑ مارنڑ نال کوڑ کوں سچ ثابت نی کیتا ونج سگدا ۔ترجمان آکھیا بھارت خود پاکستان اچ دہشت گردی کوں سپانسر کریندا پے انہاں آکھیا مقبوضہ کشمیر اچ 8سال دی نشوم بالڑی کوں ریپ تے بربریت دا نشانہ بنڑاونڑ نال بھارت دا اصل بتھاڑ نشابر تھی گے ۔ترجمان یکم مئی توں امریکہ اچ پاکستانی سفارت کاراں دی آ ونج محدود رکھنڑ متعلق ہک سوال دا جواب ڈیندے ہوئیں آکھیا جو امریکہ ایں اقدام بارے ڈسائے ۔ڈوہیں ملکاں وچال رابطے جاری ہن ۔ترجمان آکھیا پاکستان انسانی سمگلنگ کوں روکنڑ اچ پیشرفت کیتی اے تے ایں سلسلے اچ امریکہ دے نال معلومات دا تبادلہ کریندے پیوں ۔توقع اے جو امریکہ پاکستانی اقدامات کوں من گھنسے ۔خارجہ پالیسی متعلق ترجمان آکھیا اساں امریکی مفادات کوں ڈیکھدوں تے نہ کہیں ڈوجھے ملک کوں بلکہ قومی مفاد اچ اساڈی خارجہ دی پہلی ترجیح اے ۔افغانستان دے حوالے نال ترجمان آکھیا جو گزریل ہفتے کرم ایجنسی اچ افغان بارڈر سیکورٹی فورسز اتے قبائلیاں ولوں فائرنگ پاروں ایف سی دے 5جوان شہید تھن ۔ڈوہیں فورسز دے کمانڈرز وچال فلیگ میٹنگ دے بعد شہید نینگراں دی میت تے مغوی ہک نینگر کوں پاکستان دے حوالے کر ڈتا گے ۔ترجمان آکھیا پاکستان بہوں صبر دا مظاہرہ کیتے ۔پاکستان افغانستان دے نال گال بات دے ذریعے حل کرنڑ تے یقین رکھیندے۔شام دے حوالے نال ترجمان آکھیا جو پاکستان کہیں وی ملک اچ کیمیائی ہتھیاراں دے خلاف اے ۔پاکستان ایں اوکھے وقت اچ شامی بھراواں دے نال کھڑے ۔ترجمان آکھیا وزیر خارجہ خواجہ آصف شنگھائی تعاون تنظیم دے رکن ملکاں دے وزراءخارجہ اجلاس اچ شرکت سانگے 23 اپریل کوں چین دا دورہ کریسن۔